دا بحث د کابل ښاروالۍ د ملاتړې پروژې لخوا د ښوونې او روزنې پوهنتون په اډیټوریم کې جوړ شوی و چې د کابل ښاروالۍ د کلتوري او ټولنیزو چارو معین سرمحقق محمد فاضل شریفي، د شهید برهان الدین رباني د ښوونې او روزنې پوهنتون رئیس، مرستیالانو، استادانو او محصلینو، د مدني ټولنو او رسنیو استازو په کې برخه اخیستې وه.
د دې بحث په پرانیستې وینا کې د کابل ښاروالۍ مرستیال وویل، دا پروګرام د مسوولیت منلو، همکارۍ، او د ښاري ودې او پراختیا په چارو کې د ښاریانو د رول او نقش د پیاوړي کولو په هدف جوړ شوی دی.
نوموړي وویل، لازمه ده چې مسوولان د خلکو د نظرونو او معقولو غوښتنو په پام کې نیولو سره د هغوی خدمت وکړي او د ښاري ټولنې تر څنګ د پوهانو نظرونه خپلو پلانونو کې ځای پر ځای کړي.
په اخره کې د بحث د پنل ګډونوالو د موضوع اړوند څرګندونې او ویناوې وکړې، چې وروسته ترې د پوښتنو او ځوابونو لړۍ پیل شوه.
په دې لړۍ کې د استادانو او محصلینو پوښتنو ته ځوابونه وویل شول او په پای کې یې ټول نظریات او وړاندیزونه د ښاري فرهنګ د ودې لپاره ترلاسه کړل.
