د ښاري نظم راوستلو او معیاري خدمتونو وړاندې کولو په موخه د زمري په ۱۴ نیټه د کابل ښاروال محمد داوود سلطانزوی په مشرۍ د کابل ښاروالۍ رهبرۍ غونډه ترسره شوه. په یاده غونډه کې کابل ښاروال وویل، چې په دنده کې غفلت او په کارونو کې ځنډ د کابل ښاروالۍ د رهبرۍ او ښاریانو لپاره د منلو وړ نه دی . کابل ښاروال د مسئولینو له لوري ترسره شوو کړنو ته په اشارې وویل چې د دندو ترسره کولو پرمهال دې هیوادنۍ مینه او وظیفوي مسئولیتونه په نظر کې ونیسي. کابل ښاروال په ځانګړې توګه د ناحیو د دندو لایحې لکه د عوایدو راټولولو، د لاس پلورونکو لپاره د مناسب ځای ټاکلو، د سیارو کراچیو د ثبت او ډیټابیس، له ساختماني سرغړونو څخه د مخنیوي، د چاپیریال ساتنې له سرغړونکو، د ښاري بې نظمۍ، ترافیکي ګڼې ګوڼې او یو شمیر نورو مهمو موضوعاتو په اړه مفصلې خبرې وکړې. نوموړي د ساختماني سرغړونو او د ملکیتونو د غصب څخه د مخنیوي په موخه د عملیاتي مکانیزمونو جوړولو لارښوونه وکړه، څو په کمه موده کې د کارونو ښه او پر وخت ترسره کولو لپاره په خپلو کړنو کې اړین بدلونونه راولي.
