د روژې مبارکه میاشت د قرانکریم د نزول او د خدای( ج ) د بندګۍ میاشت ده. له همدې کبله د دې مبارکې میاشتې د را رسیدو په مناسبت ټولو مسلمانانو په ځانګړې توګه ټولو کابل ښاریانو ته مبارکي وایم. د اسلام مبارک دین له بنسټونو یوه یې د روژې په مبارکه میاشت کې د روژې نیول دي، چې هر کال د نړۍ د مسلمانانو له لوري ورته ښه راغلاست ویل کیږي. هیله لرم د کابل درانه ښاریان د اسلام مبارک دین له لارښونو سره سم د عباداتو ترڅنګ ټولنیزو مسایلو او ښاري اخلاقو ته هم درناوی وکړي او دغه راز له اړمنو کسانو سره مرسته وکړي. کابل ښاروالي هم په دې هڅه کې ده،څو ډیر ژر د ښار په کچه د ملي دسترخوان پروګرام پلی کړي. په همدې توګه د خوراکي توکو له ټولو پلورونکو هیله کوم،څو له انصاف او عدالت څخه کار واخلي،څو هیوادوال وکولای شي په دې مبارکه میاشت کې له خپلو کورنیو سره یوځای ارام او هوسا و اوسي او له هغه برکتونو څخه چې په یاده میاشت کې شته،ګټه پورته کړي. له لوی خدای ج څخه هیله لرم چې د دې مبارکې میاشتې په برکت په هیواد کې تلپاتې سوله او ابادي راشي.
په درنښت
کابل ښاروال
محمد داود سلطانزوی