د کابل ښاروالۍ د خپرونو او عامه ریاست له لوري د اتلسمې او نولسمې ناحیې له سیمه ییزو شوراګانو سره د ښاري کلتور د دودولو په اړه د عامه پوهاوي غونډه ترسره شوه. په دې غونډه کې د نولسمې ناحیې رئیس مولوي عبدالغفور فاتح د ښاري کلتور د ارزښت په اړه خبرې وکړې او ویې ویل: د ښاري اصولو او مقرراتو په اړه د پوهې ترلاسه کول، د ټولو ښاریانو لپاره اړین دي ترڅو کابل د بشپړ نظم او آبادۍ څښتن شي. ورته مهال د خپرونو او عامه پوهاوي ریاست د عامه پوهاوي آمر محمد یاسین امین د ښار د پاکوالي، زرغونتیا، له عامه تاسیساتو څخه د غوره ګټه اخیستنې او نورو برخو کې د ښاریانو رول مهم وباله او غوښتنه یې وکړه ترڅو ټول ښاریان په دې برخو کې خپل دیني او ملي مسئولیتونه ادا کړي. له دې غونډې څخه موخه د مسئولینو او ښاریانو ترمنځ د همکارۍ د روحیې پیاوړي کول دي؛ له همدې امله ټولې سیمه ییزې شوراګانې باید د ښاري کلتور دودولو په برخه کې مرسته وکړي. دغه راز د یادو ناحیو د سیمه ییزو شوراګانو استازو د ښاري ژوند د قانوني کېدو په برخه کې خپل وړاندیزونه او نظرونه شریک کړل او له کابل ښاروالۍ سره یې د هر راز مرستو ژمنه وکړه. په دې غونډه کې د ښاري کلتور اړوند یو شمېر ویډیويي کلپونه هم نندارې ته وړاندې شول چې، د ګډونوالو د خوښې وړ وګرځېدل