د کابل ښاروالۍ د خپرونو او عامه پوهاوي ریاست له لوري د عامه پوهاوي غونډو پر دوام، د یو ویشتمې ناحیې له سیمه ایزو شوراګانو سره د ښاري کلتور دودولو په اړه غونډه ترسره شوه. په دې غونډه کې د یو ویشتمې ناحیې رئیس حافظ حیات الله حیات د ښاري کلتور د ارزښت په اړه خبرې وکړې او له ښاري اصولو او مقرراتو څخه د ښاریانو خبرېدل یې یوه جدي اړتیا وبلله ترڅو ښاري مدیریت په غوره توګه ترسره شي. ورته مهال د خپرونو او عامه پوهاوي ریاست د عامه پوهاوي آمر محمد یاسین امین وویل: مسئولان او ښاریان باید د همکارۍ ګډه روحیه ولري ترڅو په دې توګه ښاري کلتور وده وکړي. د نوموړي په وینا؛ سیمه ایزې شوراګانې باید د ښاري کلتور دودولو په برخه کې خپل مسئولیتونه په سمه توګه ادا کړي. ورته مهال ګډونوالو هر یو د ښار د آبادۍ، د ښاري ژوند د قانوني کېدو او د ښاري کلتور دودولو په برخه کې د هر اړخیزې همکارۍ ژمنه وکړه