د ښاري کلتور د دودولو په اړه د کابل ښاروالۍ د خپرونو او عامه پوهاوي ریاست له لوري، د اوومې ناحیې اړوند د حبیبیې لېسې له زده کوونکو سره د عامه پوهاوي غونډه ترسره شوه. د کابل ښاروالۍ د خپرونو او عامه پوهاوي ریاست د عامه پوهاوي آمر محمد یاسین امین، د یادې لېسې زده کوونکي د ښاري قوانینو او مقرراتو رعایتولو ته وهڅول او ویې ویل: ښاري هوساینه د ښاریانو په مرستو پورې تړلې ده؛ زده کوونکي کولای شي د ښاري پلانونو او برنامو په پلي کولو کې رغنده رول ولوبوي او له کابل ښاروالۍ سره مرسته وکړي. ورته مهال د یادې لېسې تدریسي مرستیال فریدون رحمتي ددا ډول غونډو جوړول ګټور وبلل او ژمنه یې وکړه چې، له دې وروسته به په خپلو درسي پروګرامونو کې زده کوونکو ته د ښار د پاکوالي، د ونو د ساتنې او خړبولو، له عامه تاسیساتو څخه د غوره ګټه اخیستنې او د عامه شتمنیو د ساتنې په اړه معلومات ورکوي. په دې غونډه کې د ښاري کلتور اړوند یو شمېر ویډیويي پیغامونه هم نندارې وړاندې شول او زده کوونکو ته د پوښتنې او ځواب زمینه برابره شوه ترڅو وکولای شي په ښه توګه د ښار او چاپېریال پر وړاندې خپل ټولنیز مسئولیتونه ادا کړي. د یادونې وړ ده چې، د غونډې په پای کې د کابل ښاروالۍ له لوري د عامه پوهاوي اړوند یو شمېر ډالۍ هم پر زده کوونکو ووېشل شوې