د کابل ښاروالۍ د خپرونو او عامه پوهاوي ریاست له لوري، د عامه تاسیساتو د ساتنې، د سیمو پاک ساتلو او د زرغونو سیمو د پراختیا او خړوبولو په اړه د لسمې ناحیې اړوند د حاجي یعقوب جامع جومات د منبر لارې عامه پوهاوی ورکړل شو. د یاد جومات خطیب مولوي حمدالله لمونځ کوونکو ته سپارښتنه وکړه چې، په ښاري ژوند کې خپل مسئولیتونه او مکلفیتونه په سمه توګه ادا کړي او له یو بل سره همکار و اوسي. نوموړي همدا راز له لمونځ کوونکو وغوښتل چې، د لښتیو د اوسپنیزو پوښونو له غلا څخه د مخنیوي، د سړکونو د ساتنې او په نورو ښاري مسایلو کې له کابل ښاروالۍ سره مرسته وکړي. دغه راز نوموړي ټینګار وکړ چې، ټول ښاریان باید په خپلو سیمو کې ونې خړوب او د خپل چاپېریال په پاک ساتلو کې دې دیني او ملي مسئولیت ترسره کړي. کابل ښاروالۍ د جوماتونو له ټولو خطیبانو هیله کوي ترڅو د جمعې لمانځه د خطبو له لارې ښاریانو ته سپارښتنه وکړي چې، د ښاري مدیریت په برخه کې له کابل ښاروالۍ سره مرسته وکړي