د کابل ښاروالۍ اداري شورا غونډه د ښاري خدمتونو د بهیر د چټکتیا په موخه، د کابل ښاروال مولوي عبدالرشید په مشرۍ او ددې ادارې د مرستیالانو، د مرکزي او ناحیو د رئیسانو په ګډون ترسره شوه. په دې غونډه کې د جوازونو د صادرولو ریاست د انجنیرانو له لوري د ودانیو د ډیزاین د طرحې، په سند کې له درج شوې اندازې څخه زیات د ملکیتونو د تصرف، د ګذر وکیلانو د ګمارلو او ګوښه کولو د لارښود، په دوه ویشت ګونو ناحیو کې د سیمه ایزو شوراګانو د تنظیم او رامنځته کولو د کړنلارې او نورو ښاري مسایلو په اړه بحث وشو او اړینې پرېکړې ترسره شوې. کابل ښاروال یو ځل بیا ټینګار وکړ چې، د کابل ښاروالۍ مشرتابه پلاوی او ښاریان له مسئولینو څخه پر وخت او صادقانه توګه د کړنو ترسره کول غواړي او په دې برخه کې ورته هېڅ ډول ځنډ او غفلت د منلو وړ نه دی. نوموړي زیاته کړه چې، د نویو پلانونو په پلي کېدو سره به د ښاریانو اساسي ستونزې هوارې شي او اړتیا ده چې، ښاریان هم د پلانونو د لا ښه پلي کېدو په برخه کې له کابل ښاروالۍ سره مرسته وکړي