د هوا او چاپېریال له ککړتیا څخه د مخنیوي په اړه، د کابل ښاروالۍ د ټولنیزو او ولسي چارو د همغږۍ او د خپرونو او عامه پوهاوي ریاستونو له لوري، د لومړۍ، دویمې، درېیمې او څلورمې ناحیو ګذر وکیلانو، عالمانو او ځوانانو سره د عامه پوهاوي غونډه ترسره شوه. په غونډه کې د کابل ښاروالۍ د ټولنیزو او ولسي چارو د همغږۍ ریاست مرستیال سید عبدالعلي یاسین زي د خپلو خبرو په ترڅ کې د غونډې ګډونوال ګډو کارونو ته وهڅول او ویې ویل: موږ د ژوند پایښت لپاره پاکې هوا ته اړتیا لرو او باید د هوا له ککړتیا سره د مبارزې په برخه کې خپل رغنده رول ولوبو. نوموړي غوښتنه وکړه چې، د ځمکې لاندې اوبو د سرچینو د پیاوړتیا په موخه، باید واوره په جذب وړ سیمو کې زیرمه شي. وروسته د دویمې ناحیې مرستیال مولوي عبدالرحیم محمدي، د خپرونو او عامه پوهاوي ریاست د عامه پوهاوي آمر محمد یاسین امین، یو شمېر عالمانو، ګذر وکیلانو او ځوانانو په خپل وار خبرې وکړې او وېې ویل: د هوا او چاپېریال له ککړتیا څخه مخنیوی د ټولو ملي او اخلاقي مسئولیت دی او باید لاس په کار شو ترڅو په خپله سیمه کې په دې اړه د خلکو د پوهاوي کچه لوړه کړو ،د دوی په وینا واوره باید په سړکونو، پلو لارو او کوڅو کې ونه غوځورو، بلکې په داسې سیمو کې یې زیرمه کړو چې، د جذبولو وړتیا لري. د غونډې په پای کې د چاپېریال ساتنې اړوند یو شمېر ویډیويي کلپونه هم نندارې ته وړاندې شول چې د ګډونوالو د خوښې وړ وګرځېدل