دخپرونو او عامه پوهاوي ریاست او د یوولسمې ناحیې د مسؤلینو له لوري د دې ناحیې په اړوند سیمو کې د معدني اوبو او آیسکریم پلورونکو ته د غږیزې ککړتیا د مخنیوي او کمښت په اړه پوهاوی ورکړل شو او ټینګار وشو چې، غږیزه ککړتیا منفي پایلې لري او د توکو د پلورلو لپاره دې له لوډسپیکر څخه کار نه اخلي او پر ځای دې یې بدیله لار وټاکي. دوی ته سپارښتنه وشوه چې، د سرغړونې لیدلو په صورت کې یې لوډسپیکرونه ټولېږي چې، بیا د شکایت حق نه لري. کابل ښاروالۍ ټولو فعالیت کوونکو په ځانګړي توګه د معدني اوبو، آیسکریم، ترکاري او د لاسي توکو پلورونکو ته یو ځل بیا په ټینګار سره خبر ورکوي چې، په ښار کې د غږیزې ککړتیا لامل نه شي. د یادونې وړ ده چې، مخکې د ایسکریم او معدني اوبو د تولیدي شرکتونو له ټولنو سره همغږي شوې ده ترڅو د لوډسپیکر پر ځای له نورو بدیلو لارو څخه ګټه پورته کړي چې، په پایله کې یې یو شمېر پلورونکو خپل فعالیتونه اصلاح کړي دي خو یو شمېر نورو لا هم سرغړونه درلوده چې، د کابل ښاروالۍ له لوري به دا موضوع وڅېړل شي