د کابل ښاروالۍ له لوري د دولسمې او یو ویشتمې ناحیې اړوند د څرخي پله بازار د نوي نښلوونکي سړک د جوړولو پروژې د ښه تطبیق په موخه د یاد سړک په اوږدو کې د استملاکي ملیکتونو مالکانو ته پوهاوی ورکړل شو.
په دې برنامه کې د خپرونو او عامه پوهاوي ریاست د عامه پوهاوي آمر محمد یاسین امین، د دولسمې ناحیې اداري مدیر نبي الله نبیل، د یو ویشتمې ناحیې اداري مدیر محمد نعیم خاکسار او د استملاک ریاست استازي انجنیر ذبیح الله عادل په خپلو خبرو کې د ښاري او ترانسپورتي زیربناوو د پراختیا په برخه کې د یاد سړک د ارزښت په اړه معلومات وړاندې کړل. دوی د استملاکي ملکیتونو له مالکانو وغوښتل څو هرڅه ژر د خپلو اسنادو د پړاونو ترسره کولو په موخه کابل ښاروالۍ ته مراجعه وکړي.
د معلوماتو له مخې؛ د دې سړک په اوږدو کې ۱۳۰ ملیکتونه تر استملاک لاندې دي چې، د قانون او کړنلارې له مخې به یې مالکانو ته بدیل حقونه ورکړل شي.
ورته مهال د دولسمې ناحیې د ۱۹م ګذر وکیل زیارمل بابکرخیل او د سیمې یو شمېر نورو اوسېدونکو د دا ډول پروژو له پلي کېدو هرکلی وکړ او ویې چې، د دې سړک په جوړېدو سره به دوی ته ګڼې ترانسپورتي او ټولنیزې آسانتیاوې رامځته او د څرخي پله سیمې اقتصادي ودې ته به زمینه برابره شي.
د کابل ښاروالۍ د ښاري زیربناوو ریاست د ډیزاین له مخې؛ د څرخي پله بازار سړک چې، د دولسمې او یو ویشتمې ناحیې ترمنځ غځېږي ۱۴۱۰ متره اوږدالی او ۳۰ متره سور لري چې، په معیاري توګه ډیزاین شوی دی او چارې به یې ډېر ژر پیل شي.
په دولسمه او یو ویشتمه ناحیه کې د نوي نښلوونکي سړک د کار د پیل په اړه پوهاوی ورکړل شو