د کابل ښاروالۍ د ټولنيزو او فرهنګي چارو مرستیال مولوي حبيب الرحمن منصور، د ګذر وکيلانو د ګمارنې د شرايطو په اړه د دوه ویشت ګونو ناحیو له فرهنګي مديرانو سره غونډه وکړه. په دې غونډه کې د کابل ښاروالۍ د ټولنیزو او فرهنګي چارو مرستیال د ګذر وکیلانو مکلفیتونه او مسوولیتونه د غونډې ګډون والو ته تشریح کړل او ټینګار یې وکړ چې، د سمسور ښار او خلکو ته دهوسا ژوند رامنځته کولو په موخه، له چارواکو سره د ګذر وکیلانو د مرستو کچه باید لوړه شي. نوموړي زیاته کړه چې، ګذر وکیلان دې باید د قانوني ښاري ژوند جوړولو په پار، د ښاریانو او مسوولانو ترمنځ د مرستې روحیه پیاوړې کړي او د ګذر وکیلانو د ګمارنې او ګوښه کولو د نوې کړنلارې له مخې دې ښاري او ټولنیزې ستونزې په ګوته او د هغو د له منځه وړلو په نیت دې، له اړوند مسوولانو سره هر اړخیزې مرستې وکړي. دغه راز د کابل ښاروالۍ د خلکو د همغږۍ چارو رئیس محمد ناصر کبیري د ګذر وکیلانو د ګمارنې او ګوښه کولو د نوې کړنلارې او د ګذرونو د ویش د نوې کړنلارې په اړه وضاحت ورکړ او ټینګار یې وکړ چې، د ناحیو مسوولان باید د ګذروکیلانو په ټاکنه کې له احتیاط او امانتدارۍ څخه کار واخلي. دګذر وکیل د خلکو استازي دی او باید ښه شهرت، نیک اخلاق او اړینې زده کړې ولري. په دې غونډه کې د ناحیو د فرهنګي برخې مدیرانو د کابل ښاروالۍ مشر تابه ته خپلې ستونزې وړاندې کړې، چې د لازمو اجرااتو په موخه یې لازمې سپارښتنې وشوې