ټاکل شوې ده چې د کابل ښار د زرغونو سیمو د پراختیا په موخه، د کابل ښاروالۍ د زرغونتیا ریاست له لوري د نیالګیو کېنولو د خزاني کمپاین پر لړ کې د نولسمې ناحیې د زرغون کمربند اړوند د تنګي غارو په سیمه کې د پستې، روسۍ ولو، ارغوان، مورپان، ناجو او د سرو شاو خوا لس زره نیالګي کېنول شي. د زرغونتیا ریاست مرستیال سراج الدین پټان وویل چې، د تنګي غارو د زرغونو سیمو د پراختیا په موخه، د مني له موسم سره برابر د روزل شویو لسګونه زره نیالګیو او زینتي بوټو د کېنولو چارې روانې دي ترڅو یاده سیمه په یو غوره او مناسب تفریحي ځای بدل شي. نوموړي زیاته کړه: د ښار په دننه کې د زرغونو سیمو د پراختیا سربېره، د کابل ښار د غرونو او تپو د لمنو زرغونولو ته هم پام شوی دی ترڅو سالم ښاري ژوند او ذهني آرامتیا ته زمینه برابره او خلک پاکې هوا او سالم ښاري چاپېریال ته لاس رسی ومومي