شاروال کابل از سوی شهروندان نواحی مختلف مورد تقدیر قرار گرفت

مولوی عبدالرشید شاروال کابل، به پاس خدمات ارزنده و مؤثر خویش در بخش بهبود امور شهری، از سوی شوراهای وکلای گذر، جوانان نواحی بیست‌ و دو گانه و شماری از نمایندگان اهالی نواحی مختلف شهر کابل مورد تقدیر و ستایش قرار گرفت.
در نشست های جداگانه، شهروندان ضمن ابراز تشویق و قدردانی از کارکردهای شاروال کابل، شماری از مشکلات و چالش‌های موجود شهری را نیز با وی در میان گذاشتند.
مولوی عبدالرشید شاروال کابل پس از استماع دیدگاه‌ها و مشکلات شهروندان، برنامه‌ها و پلان‌های آیندهٔ شاروالی کابل را تشریح نموده گفت: شاروالی کابل در نظر دارد با همکاری شهروندان، پروژه‌های زیربنایی و عام‌المنفعه را بر اساس اصل انکشاف متوازن تطبیق نماید تا زمینهٔ رشد پایدار اقتصادی و فراهم‌سازی سهولت‌های محیطی و شهری به‌گونهٔ مؤثر مهیا گردد.
وی همچنان خاطرنشان ساخت که از نظریات و پیشنهادات سازنده و معقول شهروندان در برنامه‌ریزی‌های شهری استفادهٔ اعظمی صورت خواهد گرفت و خدمات شهری به‌گونهٔ عادلانه و یکسان به تمامی شهروندان نواحی مختلف شهر کابل ارائه می‌گردد.
شاروال کابل تأکید کرد که تشویق و قدردانی شهروندان، روحیهٔ خدمت‌گذاری صادقانه را تقویت می‌بخشد و شاروالی کابل تلاش می‌نماید تا بیش از پیش به مشکلات و نیازهای شهروندان کابل رسیدگی صورت گیرد.