د ښځو پر وړاندې د تاوتریخوالي د منع قانون پوهاوی ورکول په نامه یو ورځنی ورکشاپ د ښځو چارو وزارت او د کابل ښاروالۍ د جنډر آمریت په همغږۍ د دغه بنسټ د ناستو په تالار کې جوړ شو. په دغه ښوونیز پروګرام کې د کابل ښاروالۍ د ښاري او چاپېریالي خدمتونو مرستیالې ډاکټرې مهتاب عالمي وویل: دغه بنسټ پر خپلو ژمنو عمل کوي او د ښځو پر وړاندې د تاوتریخوالي د له منځه وړلو لپاره مبارزه کوي او هڅه کوي چې د ښځو پر وړاندې د تاوتریخوالي د منع کولو د قوانینو او کړنلارو په اړه د مرکزي ادارو او ناحیو د کارمندانو د پوهاوي کچه لوړه کړي. د یادونې وړ ده چې دغه پروګرام د کابل ښاروالۍ د کارمندانو لپاره د ښځو پر وړاندې د تاوتریخوالي د منع د قوانینو، کړنلارو او لارښودونو په روښانولو او تشریح کولو پای ته ورسېد.
