د روان کال د تلې په یولسمه، د یولسمې ناحیې لومړي ګذر د رغونې چارې، د کابل ښاروال محمد داود سلطانزوی لخوا د سیمې مشرانو او اوسېدونکو په شتون کې پیل شوې. کابل ښاروال په دغو مراسمو کې وویل،چې د ښاري تاسیساتو برابرول او د ښار د بیلابیلو سیمو وده زموږ یو له لومړیتوبونو څخه دي چې په پلان کې به ورته پاملرنه وکړو. نوموړي دغه راز وویل چې،په پام کې لري د ناحیو برابرې ودې ته په کتو سره د را روان کال په پیل کې د ښار په کچه ناحیو کې ګڼ شمیر سړکونه جوړ شي،چې د چاپیریالي آسانتیاوو تر څنګ به د کابل ښار په اقتصادي وده او پرمختګ کې هم د پام وړ اغیزې ولري. هغه د ښار په ودانولو کې د ښاریانو ونډه مهمه او ګټوره وبلله او له هغوی یې هیله وکړه چې د کابل ښاروالۍ د پروژو پلي کېدو څخه څارنه وکړي او په ساتنه کې یې هم ونډه واخلي. کابل ښاروال د ښاري نظم خوندیتوب لپاره د ښاري اصولو په مراعتولو او د قانون په حاکمیت هم ټینګار وکړ. دغه پروژه چې پکې ۴۹۰۷ مترو په اوږدوالي سړک، ۹۲۷ مترو په اوږدوالي د پلو لارې او د ۹۴۱۷ مترو يه اوږدوالي د اوبو رسونې شبکې جوړل شامل دي د راروانو ۱۰ میاشتو په موده کې به د ۶۹ میلیونه افغانیو په ارزښت د کابل ښاروالۍ له پراختیایي پروګرام جوړې شي. په پروژه کې به له پیل څخه تر پایه ښاریانو ته کاري بوختیاوي هم برابرې شي.
