د کابل ښاروالۍ د مارکېټونو د تنظیم ریاست له لوري د ښار په کچه په بازارونو کې د لومړنیو توکو د نرخونو د کنټرول او له احتکار څخه د مخنیوي په موخه څارنې روانې دي. د کابل ښاروالۍ د مارکېټونو د تنظیم رئیس مولوي مدثر محمد یونس وویل چې، په هټیو، لویو پلورنځیو او د تیلو په ټانګونو کې نرخونه وڅارل شول او سرغړونکو ته د اړینو سپارښتنو سربېره، ټینګار وشو ترڅو انصاف په پام کې ونیسي او خپل توکي د کابل ښاروالۍ د نرخنامې مطابق وپلوري. نوموړي زیاته کړه چې، له نرخنامې څخه د پرلپسې سرغړونې په صورت کې قانوني چلند کیږي، نو اړتیا ده چې ټول ښاریان د نرخنامې د فرهنګ په دودولو کې له اړوندو مسئولینو سره مرسته وکړي