د نېکمرغه کوچني اختر د را رسېدو په مناسبت، د کابل ښاروالۍ د مارکېټونو د تنظیم ریاست له خوا د ښار په کچه په بازارونو کې د نرخنامې د تطبیق له څرنګوالي څارنې ګړندۍ شوې دي ترڅو ښاریان وکولای شي په مناسب قیمت او لوړ کیفیت خپل د اړتیا وړ توکي ترلاسه کړي. د کابل ښاروالۍ د مارکېټونو د تنظیم ریاست مرستیال انجنیر عصمت الله انصار په دې اړه وویل: په هټیو او لویو پلورنځیو او قصابیو کې د توکو له نیټې او کیفیت او په همدې توګه د جامو ګنډلو د قیمت له څرنګوالي څارنه وشوه چې، له نېکمرغه فعالیت کوونکو خپل توکي د کابل ښاروالۍ د نرخنامې مطابق پلورل. نوموړي زیاته کړه چې، د ښاریانو د روغتیا خوندي ساتلو په موخه، د خوراکي او غیر خوراکي توکو له کیفیت او نېټې او د کلچه پخوونکو له حفظ الصحې څخه هم څارنه وشوه.