ناصري
انسانې اړتیاوو ته په کتو په آسانۍ پوهیدلای شو چې، د ځمکې پرمخ د شته مخلوقاتو ژوند څومره په سالم چاپېریال پورې تړلی دی، پاکې اوبه، پاکه هوا، صحي خواړه، په کافي اندازه آکسیجن او داسې نور د انسانانو د ژوند مهم عنصرونه دي چې، دا ټول په یوه پاک او مناسب چاپېریال پورې تړاو لري.
د روغتیا متخصصین هم په دې باور دي چې، سالم چاپېریال د انسانانو په فزیکي او روحي وجود باندې په مستقیم او غیر مستقیم ډول اغیزې لري، دغه متخصصین وایې: یوازینی شی چې، د روغتیا او د ذهني سکون لپاره مناسب ګڼل کیږی، هغه دپاک او سالم چاپېریال شتون دی.
چاپېریال او طبیعت د الله(ج) له لورې د ځمکې پرمخ ژوندیو موجوداتوته یوه ډالۍ ده چې، د هر ژوندي مخلوق په شاوخوا کې شتون لري او د ژوند دوام یې په همدې چاپېریال پورې تړلی دی.
د چاپېریال ککړتیا او له منځه وړل، د ژوندیو موجوداتو په ژوند منفي اغېزه لري چې د انسانانو، حیواناتو، نباتاتو او نورو ژوندیو مخلوقاتو ژوند له جدي ګواښ سره مخ کوي.
په نننۍ نړۍ کې دغوره او مناسب چاپېریال نه شتون د بشري تمدن د مخنیوي لپاره یوه جدي ستونزه بلل کیږي، چې د داسې چاپېریال جوړول د انسانانو د ژوند لپاره خورا مهم دی او باید په جوړولو او رامنځته کولو کې یې خپلې هڅې و نه سپموو.
چاپېریال(طبیعت) د انساني نسل د پایښت لپاره رامنځته شوی او د انسانانو او طبیعت ترمنځ نه شلېدونکې اړیکې شتون لري.
دیني عالمانو له طبیعت سره د انسان دغه تړاو او تسلسل ته په اشارې ویلې دي: چاپېریال او طبیعت یو ستر نعمت دی، چې پاک خدای(ج) انسانانوته سپارلی او خلک یې مسئول ګڼلي دي چې سالمه ګټه ترې پورته کړي.
همدا رنګه د دیني لارښوونو له مخې، چاپېریال د انسان د ودې او پرمختګ لپاره غوره بستر او بنسټ دی چې له همدې امله باید انسانان د دې نعمت په ساتلو کې خپله ایماني، ټولنیزه او کلتوري دنده او مسئولیت په ښه توګه سرته ورسوي، ترڅو دتل لپاره د سالمې روغتیا لرونکي شي.
د طبیعت نظام د حکمت پر بنسټ رامنځته شوی او ټول عناصر یې لکه ورېځې، باد، غرونه، دښتې، لمر او په اسمان کې ستوري، ټول دانسانانو د ګټې اخیستنې په موخه پیدا شوي، څو د هغوی په رڼا کې د ځمکې پرمخ مخلوقات روحانیت ته ورسېږي او په خپل ځان کې د دنیا او آخرت کمال پیداکړي.
امام صادق (رح) دچاپېریال په اړه وایې: که تاسو په سم فکر سره د مخلوقاتو نړۍ وڅیړئ، تاسو به چاپېریال د یوې ودانۍ په څیر ومومئ، چې په هغه کې هر هغه څه چې د مخلوقاتو د اړتیا لپاره تر سترګو کیږي، د انسانانو، نباتاتو او حیواناتو د اړتیاوو د پوره کولو لپاره برابر شوي دي.
همدارنګه پاک خدای(ج) په طبیعت کې ټول نعمتونه د انسانانو د ودې او پرمختګ لپاره پیدا کړي او انسان یې د دغو نعمتونو خليفه او څښتن ګرځولی،له همدې امله هر انسان مکلف دی چې، د خپل چاپېریال د ساتلو لپاره هڅې وکړي، ترڅو په ټولنه کې دناروغیو کچه ټيټه شي.
د ځمکې ساتنه او پراختیا، د ټولو انسانانو دیني او اخلاقي دنده ده او دغه دنده باید په مسئولیت سره ادا کړي، څو په چاپېریال کې د دوی لپاره د هوسا ژوند زمینه برابره شي.
څېړونو ښودلې ده چې، نننۍ صنعتي نړۍ د ځنګلونو له منځه تللو، د زرغونو سیمو له کمښت، د زینتي بوټو او نباتاتو له وچیدو سره مخ ده، خلک په دې لټه کې دي چې څنګه خپلو شخصي موخوته ځان ورسوي او په ښارونو کې لوړې او دنګې ودانۍ جوړې کړي! خو دا فکر ورسره نشته چې، د دنګو ودانیو ترڅنګ باید د خپل چاپېریال ساتلو لپاره هم یوه لار ولټوي ترڅو د خپل هیواد راتلونکی په نوې او عصري ټیکنالوژۍ سمبال کړي.
دا ټولو ته څرګنده ده، چې په زرغونې او پاکې فضا کې ژوند کول او د تازه هوا تنفس کول، ذهني فشار کموي.
پاکه هوا دژوندیو موجوداتو په ژوند کې مهم او اړین عنصر دی چې، انسانان له هوا څخه پرته ژوند نشي کولای او خلک دومره بې پروا شوې دي چې آن ټول صنعت کاران یوازې په دې لټه دي، چې څنګه خپل عاید زیات کړي، ځکه د دوی د فابریکو له امله په فضا کې ټوله هوا دګټې اخیستنې وړ نه ده.
بل لورې ته ساینس پوهان هم په دې باور دي چې، د طبیعي آفتونو په پرتله صنعتي آفتونه ډیر شوي او خلک هره ورځ د بېلا بېلو ناروغیو ښکار کیږي. دوی وایې: د پاک او زرغون چاپېریال بیا را ژوندي کول، په ځمکه کې د ژوند لپاره د چاپېریال تازه والی، په انسانانو کې د خوشحالۍ هیلې د پیدا کولو او د ناروغیو په کمښت کې تر ټولو لویه لاسته راوړنه ده.
د انسان په روغتیا باندې د هوا د اغېزې په برخه کې ترسره شوېو څیړنو ثابته کړې چې، د انسان د رواني شخصیت یوه برخه د هغه چاپېریال له خوا اغېزمنه کیږي، کوم چې دوی پکې ژوند کوي، نو ځکه د هوا ککړتیا نن ورځ خلک اندېښمن کړي او په کار ده چې د چاپېريال په بيا رغولو او ساتنې سره، د انسان ذهني او جسمي اړخونه پياوړي کړو!
نو راځئ د چاپېریال جوړښت او ساتنه، یوازې دښاروالیو اونورو ادارو دنده و نه ګڼو، بلکې خپل چاپېریال د خپل کور یوه برخه وبولو او په خوندي ساتلو کې یې له هېڅ راز هلوځلو ډډه ونکړو!