“ناصري”
ښاري ژوند د انسانانو د ټولنیز پرمختګ، اقتصادي ودې او راکړې ورکړې مهمه برخه بلل کېږي. ښارونه د بېلابېلو قومونو، کلتورونو او فکرونو د راټولېدو ځایونه دي، له همدې امله د ښاري ژوند لپاره ځانګړي اصول او مقررات اړین دي تر څو نظم، امن، پاکوالی او همغږي وساتل شي. که په ښار کې خلک له اصولو او قوانینو پرته ژوند وکړي، نو ګډوډي، بې نظمي او ستونزې به زیاتې شي. د ښاري ژوند اصول د هر وګړي لپاره د مسئولیت، درناوي او مرستو چوکاټ جوړوي.
دغوره ښاري ژوند اصول په لاندې ډول دي:
۱- د قانون درناوی
په ښار کې ژوند کول د قوانینو منل او عملي کول غواړي. دا قوانین د ترافیک، عامه نظم، سوداګرۍ، چاپېریال ساتنې او نورو برخو پورې تړاو لري.
د ترافیکي قوانینو مراعات کول د پېښو مخه نیسي.
د عامه ملکیت ساتنه، د ښار ښکلا او شتمني خوندي کوي.
د دولتي مقرراتو مراعت کول ټولنیز نظم ټینګوي.
هر وګړی باید ځان د قانون تابع وبولي، ځکه قانون د ټولو لپاره یو شان دی.
۲- د پاکوالي او چاپېریال ساتنه
پاکوالی د ښاري ژوند بنسټیز اصل دی. په ښار کې د نفوس ډېروالی د کثافاتو د زیاتوالي لامل کېږي. که چېرې خلک په دې اړه خپل مسئولیت ادا نه کړي، نو ناروغۍ او چاپېریالي ستونزې رامنځته کېږي.
کثافات باید په ځانګړو ځایونو کې واچول شي.
د اوبو، هوا او ځمکې له ککړتیا څخه باید ډډه وشي.
زرغونې سیمې او پارکونه باید خوندي وساتل شي، ځکه پاک ښار د روغ ژوند نښه ده.
۳- د یو بل درناوی او ټولنیز اخلاق
ښار د بېلابېلو خلکو ګډ کور دی. د یو بل درناوی، زغم او همکاري د ښاري ژوند مهم اصلونه دي.
د ګاونډیانو حقونه باید مراعات شي.
لوړغږ، شور او نورو ته مزاحمت باید محدود وي.
له عامه ځایونو څخه د ګټې اخیستنې پر مهال باید ادب او نظم وساتل شي، ځکه غوره اخلاق د ښاري ژوند فضأ آرامه او دوستانه کوي.
۴- د وخت ارزښت او نظم
په ژوند کې وخت ډېر ارزښت لري. خلک د کار، زده کړې او سوداګرۍ لپاره ځانګړي مهالوېشونه لري.
په ټاکلي وخت کار ته رسېدل د مسئولیت نښه ده.
د عامه خدمتونو د وړاندې کولو په برخه کې د وخت مراعاتول اړین دي.
منظم ژوند د پرمختګ لامل کېږي، ځکه بې نظمي نه یوازې شخص ته زیان رسوي، بلکې ټولنه هم اغېزمنوي.
۵- اقتصادي مسئولیت او حلال عواید
ښاري ژوند زیات لګښتونه لري. هر وګړی باید هڅه وکړي چې، د خپل ژوند عواید له حلالې لارې ترلاسه کړي او د درغلیو، احتکار او فساد څخه ځان وساتي ځکه چې، صادقانه سوداګري د باور فضأ رامنځته کوي.
د مالیې ورکول د ښار د پرمختګ لامل ګرځي.
د کار او تولید هڅونه اقتصادي ثبات تضمینوي.
۶- د امنیت او خوندیتوب مراعاتول
امنیت د ښاري ژوند اساس دی. خلک باید د خپل او نورو خلکو د امنیت په اړه پاملرنه وکړي.
د مشکوکو فعالیتونو راپور ورکول.
د عامه شتمنیو ساتنه.
د اور، زلزلې او نورو پېښو پر مهال د خوندیتوب اصول باید مراعات شي.
۷- د ټکنالوژۍ او عصري وسایلو سمه کارونه
ښارونه د پرمختللې ټکنالوژۍ مرکزونه دي. د انټرنېټ، ټولنیزو رسنیو او برېښنايي وسایلو سمه کارونه اړینه ده.
د ناسمو معلوماتو له خپرولو څخه ډډه کول.
د نورو شخصي حریم ته باید درناوی وشي.
ښاري ژوند که څه هم له آسانتیاوو، پرمختګ او فرصتونو ډک دی، خو له اصولو او مقرراتو پرته ستونزمن کېږي. هر وګړی باید د قانون، اخلاقو، پاکوالي، نظم او مسئولیت احساس ولري. کله چې ټول وګړي خپل مسئولیتونه په غوره توګه ترسره کړي، ښار به په یو ښکلي، خوندي، منظم او هوسا ځای بدل شي. په پای کې ویلی شو چې، ښاري ژوند یوازې د ودانیو او سړکونو نوم نه دی، بلکې د انساني همغږۍ، ګډ مسئولیت او مدني شعور څرګندونه ده.
د ښاري ژوند اصول او مقررات