کابل ښاروالي په پام کې لري چې په اتمه ناحیه کې یو ښځینه مارکیټ جوړ کړي، په همدې موخه د دې طرحې د امکان سنجونې په موخه سروې ترسره شوه. دا سروې په اتمه ناحیه کې د ښځینه مارکیټ د کمیت او کیفیت په اړه د تجارت پیشه ښځو د نظرونو د راټولولو په موخه شوې. ټاکل شوې چې دغه مارکیټ په اتمه ناحیه کې د کابل ښاروالۍ پراختیایي پروګرام (KMDP) له لوري د نړیوال بانک په مالي ملاتړ او د اشتغال زایی – کارموندنې پروژې د څلورمې برخې په اډانه کې، چې د کابل ښاروالۍ له لوري تطبیقېږی، جوړ شي. په دې سروې کې د کابل ښاروالۍ د پراختیايي پروګرام تخنیکي ټيم د کابل ښار د اتمي ناحیې د ریاست په همکارۍ له یو شمېر تجارت پیشه ښځو، دوکاندارانو او د دې ناحیې له اوسېدونکو او متنفذینو سره مرکې وکړې او په دې توګه د دغه مارکیټ د جوړولو په اړه د مرکچیانو لیدلوري راټول کړل شول. کابل ښاروالي د کارموندنې/ اشتغال زایی EZ-Kar- پروژې د یوې برخې د پلي کوونکي بنسټ په توګه د بوختیا او اقتصادي فرصتونو د زیاتولو په موخه د چاپېریال او بیخبنسټونو د پياوړتیا په لټه کې ده. د دې موخې د ترلاسي لپاره په پام کې لري چې په راتلونکو څو کلونو کې په کابل ښار کې ځينې مارکیټونه ورغوي او ځينې نور د ښځو د مارکیټونو په ګډون له سره جوړ کړي.
