وَمَا أَرْسَلْنَاكَ إِلَّا رَحْمَةً لِّلْعَالَمِينَ
د پیغمبر اکرم ((ص)) د نېکمرغه میلاد په مناسبت د کابل ښاروال پیغام
د بشریت د ستر لارښود او پر ځمکه د الله ((ج)) د وروستي استازي حضرت محمد مصطفی ((ص)) د زیږېدو ورځ، ټول مسلمان امت ته له ارزښته ډکه او نېکمرغه ورځ ده. حضرت محمد((ص)) د دې لپاره پیغمبر وټاکل شو چې، نړۍ او انسانان له خرافاتو، جهالت، بې عدالتۍ، ظلم او ناوړه ټولنیزو کړنو وژغوري او د حق او د الله ج د وحدانیت لوري ته یې را وبولي. اړینه ده چې، موږ د دې ستر پیغمبر له نیکواخلاقو او سیرت څخه ځان خبر او د ژوند ټولې چارې مو د هغه ((ص)) له لارښونو او سنتو سره برابرې کړو، څو په دنیا او اخرت کې مو نیکمرغۍ او بریالیتوبونه په برخه شي. حضرت محمد ((ص)) د غوره حکومتولۍ او نیکو اخلاقو مثال وو او موږ ته ښايي، چې په ټولو ټولنیزو برخو کې د هغه ((ص)) لارې تعقیب کړو. د دې نېکمرغه ورځې په برکت د لوی خدای ج له درباره څخه ځان او د کابل ښاروالۍ نورو مسئولانو ته د ریښتیني خدمت کولو توفیق غواړم او د ګران افغانستان د لا پرمختګ او او آبادۍ هیله لرم.
په درنښت
کابل ښاروال
الحاج مولوي عبدالرشید