د کابل ښار د ۱۳ مې او ۱۴ مې ناحیو اړوند، د قلعه عبدالعلي په سیمه کې د کوڅو د جوړولو چارې چې، څه موده وړاندې پیل شوې وې، روانې دي. د کابل ښاروالۍ د پروګرامونو او پروژو رياست د خدماتي پروژو دڅارنو آمر انجنير محمد فهيم دراني په دې اړه وويل: تر اوسه د دې پروژې چارې ۲۸ سلنه پرمخ تللې او د روان کال تر نيمايي پورې به بشپړې او ګټې اخيستنې ته وسپارل شي. نوموړي زياته کړه، د يادې سيمې کوڅې چې په ټوليزه توګه له ٦ کيلومترو څخه زيات اوږدوالی لري او پلنوالى يې له ٣ مترو تر ۶ مترو پورې دى، د څه باندې ۳۱ میلیونه افغانیو په لګښت د ښاروالۍ له داخلي بودیجې څخه جوړیږي چې په جوړېدو سره به یې د سیمې د اوسیدونکو موسمي ستونزې حل شي. د یادولو وړ ده چې، د کابل ښاروالۍ د پروګرامونو او پروژو ریاست انجنیران د دغې پروژې له کیفیت او کار څخه په منظمه توګه تخنیکي او فني څارنه کوي