د کابل ښاروالۍ د مسئولانو او د اداري پړاوونو د ساده کولو ریاست د استازو ترمنځ، د پېچلو اداري پړاوونو د آسانه کولو په موخه لومړۍ غونډه ترسره شوه. په دې غونډه کې کابل ښاروال مولوي عبدالرشید ښاریانو ته د آسانتیاو رامنځته کولو په اړه وویل چې، اړینه ده ټول پیچلي پړاوونه لنډ او ساده شي او په دې برخه کې د یاد ریاست مرستې ته جدي اړتیا لیدل کیږي. ورته مهال د اداري پړاوونو د ساده کولو رئیس وویل چې، د کابل ښاروالۍ د اداري پړاوونو له آسانه کولو څخه یې موخه، د بشري سرچینو له بې ځایه لګښت او د وخت له ضایع کېدو څخه مخنیوی دی، چې په لومړي پړاو کې به د ودانیز جواز د اخیستلو پړاوونه د کابل ښاروالۍ له مسئولانو سره په همغږۍ کې آسانه او ساده شي. د یادونې وړ ده چې، د اداري پړاوونو د ساده کولو ریاست د چارو اداري په چوکات کې فعالیت کوي او په بېلابېلو ادارو کې د پېچلو اداري پړاوونو د ساده کولو مسئولیت په غاړه لري. ټاکل شوې ده، د کابل ښاروالۍ پېچلي او ستونزمن اداري پړاوونه له یاد ریاست سره د هوکړه لیک تر لاسلیک کولو وروسته آسانه او ساده شي