د کابل پوهنتون د وترنري پوهنځي د محصلانو د عملي کارونو د کچې د لوړولو په موخه څېړنيز سيمينار، چې په کابل ژوبڼ کې جوړ شوی وو،او دوه اونۍ يې دوام وکړ د سندونو په وېشلو سره په برياليتوب پای ته ورسېد. د دې سیمینار په ترڅ کې د کابل ژوبڼ د بېلابېلو برخو دمدیریتونو له خوا، د اهلي او وحشي حیواناتو، الوتونکو، خزندو، د ژوندیو ماهیانو د میوزیم او د دغه بڼ د مدیریت د څرنګوالي په اړه هر اړخیز معلومات وړاندې شول. د کابل ژوبڼ رييس عزيزګل ثاقب، د کابل ژوبڼ د راتلونکو پروګرامونو او پلانونو په اړه معلومات ورکړل او ويې ويل چې، د کابل ژوبڼ د هېواد په کچه يو په زړه پورې علمي، څېړنيز او تفريحي بنسټ دى، چې د وړکتون ماشومان، د ښوونځيو زده کونکي او د هیواد د بیلابیلو پوهنتونونو محصلان ددې ځای لیدونکي دي او هسې چې اړتیا ده موږیې هرکلی کوو. همدا راز د کابل پوهنتون د وترنرۍ پوهنځي مسوولانو، د کابل ژوبڼ د اړوندو څانګو له مسوولانو څخه د دوامداره همکارۍ او زیار له امله مننه او قدرداني وکړه