د کوچني اختر په مناسبت د ګلبهار خیریه بنسټ له خوا د کابل ښاروالۍ له تنظیفي کارکوونکو سره مرسته وشوه.د ګلبهار بنسټ مطبوعاتي مسوول محمد عمر ځواک وويل، چې دغه مرسته د اته ميليونه افغانیو په ارزښت ترسره شوه او په لومړي ګام کې ( ۵۰۰ ) تنو تنظیفي کارکوونکو ته، چې ډېرې اقتصادي ستونزې یې درلودې، هر یوه ته (۱۰۰۰۰) ۱فغانۍ ورکړل شوې او پاتې نورو ( ۳۱۰۰ ) تنو ته به یو یو بوتل (۵) کیلویي غوړي ورکړل شي.نوموړي زياته کړه چې دتنظیفي کارکوونکو تشویق او مالي ملاتړ زموږ ملي دنده ده، ځکه دوی د ښار د پاکوالي لپاره ډېرې هڅې کړې دي. په ورته وخت کې د کابل ښاروالۍ د تنظیف رئیس مولوي سعدالله عثماني د یاد بنسټ له دې نیک احساس څخه د ستاینې په ترڅ کې وویل چې، د دې ادارې کارکوونکي په هر ډول شرایطو کې د کابل ښاریانو خدمت ته چمتو دي. یاد بنسټ په تېرو کلونو کې هم د اختر په مناسبت تنظیفي کارکوونکي تشویق کړي او مالي مرسته یې ورسره ګړې، چې موږ یې له دغه ملي احساس څخه مننه کوو.