اسلامي ارزښتونو ته د درناوي په موخه د اوومې ناحیې په انګړ کې د حضرت بلال(رض) په نامه یو جومات تر چارو بشپړېدو وروسته د یادې ناحیې د رئیس مولوي عبدالغفور له لوري په داسې حال کې چې ګڼ شمېر ښاریانو یې ملتیا کوله ګټې اخیستنې ته وسپارل شو. د اوومې ناحیې رئیس وویل چې، کابل ښاروالي د زیربناو جوړولو او خدمتونو وړاندې کولو سربېره د شریعت د تقويه کېدو په موخه جوماتونه هم جوړوي. نوموړي دغه راز د یادې ناحیې له یو شمېر مخلصو ښاریانو چې د یاد جومات په جوړولو کې یې برخه اخیستې ده مننه وکړه. دغه جومات په ۴۸ متر مربع ځمکه کې د یو پوړ په لرلو سره د ۴۰۰ زره افغانیو په لګښت د ښاریانو په مالي ملاتړ په بنسټیزه توګه جوړ شوی دی او په یو ځل د ۵۰ لمونځ کوونکو د ځایولو وړتیا لري. د ناحیې کارکوونکي او مراجعین به په یاد جومات کې خپل لمونځ ادا کوي. جوماتونه اسلامي شعایر دي، چې له لارې یې مسلمانان سالمې اسلامي ټولنې ته رسیدلي دي او د خلکو په مینځ کې د مینې او ورورولۍ سبب ګرځي هغه کسان چې د جوماتونو په جوړولو کې برخه اخلي، د الله ج د رحمت تر سیوري لاندې راځي.