د کوچني اختر په مناسبت د پل سوخته په سیمه کې د امیري طبي کمپلکس په مالي ملاتړ د یوه لوی ګلدان د جوړولو چارې بشپړې او د کابل ښاروالۍ د ښاري خدمتونو او چاپیریال ساتنې د مرستیال مولوي محمد خالد سجستاني له لوري په داسې حال کې چې، د کورنیو چارو وزارت د ستراتيژۍ او پالیسۍ معین عبدالحق مخدوم یې ملتیا کوله ګټې اخیستنې ته وسپارل شو. مولوي محمد خالد سجستاني وویل چې، د ښاریانو د رواني آرامۍ او ښاري ښکلا پروګرامونه د ملي پانګوالو او سوداګرو په مرسته پراختیا مومي. نوموړي د ښاري ښکلا په برخه کې د پنځمې ناحیې د مرستیال رفیع الله احمدزي بې دریغه هڅې وستایلې او هیله یې وښوده چې، ملي سوداګر او پانګوال به د ښاري ښکلا او آبادۍ په برخه کې لا ډېره ونډه واخلي. یاد ګلدان ۶۰ متره اوږدوالی، ۴ متره او ۶۰ سانتي پراخوالی او ۲ متره او ۶۵ سانتي لوړوالی لري چې، په پوړیزه بڼه د څراغونو او په رنګ رنګ موسمی ګلانو ښکلی شوی او په بنسټیزه توګه جوړ شوی دی