د زرغونو سیمو د پراختیا او ښاري ښکلا په موخه په پنځلسمه ناحیه کې د بي بي ساره پارک زرغونې سیمې د یادې ناحیې د مسئولانو او ښاریانو په مرسته پراخه شوې. د پنځلسمې ناحیې رئیس عبدالبصیر آخند زاده وویل چې، د یاد پارک اصلي مالکان د سیمې خلک دي او په ساتنه کې یې هم د دوی رول او مسئولیت مهم دی
د نوموړي په وینا د کابل ښاروالۍ مشرتابه د یاد پارک د ونو او زرغونو سیمو په ساتنه کې د ښاریانو مرسته د ستاینې وړ بولي. ښاغلي آخند زاده هیله وښوده چې، نور ښاریان به هم د زرغونو سیمو ساتنې ته پام وکړي، ځکه ښاروالي په یوازې توګه نشي کولای د ښار ټولو زرغونو سیمو ته د ښاریانو له مرستې پرته رسېدنه وکړي د بي بي ساره پارک ۲۰۳۵۰ متره پراخوالی لري چې، د پارک انګړ، د پلو لارو په تیږو فرش، د سیوري ځایونه، څوکۍ، د خړوب ژوره څاه، د ساتونکي خونه، چمن، ګلان او د ښکلا آبشارونه په بر کې نیسي.