د کابل ښاروالۍ دخلکو د همغږۍ ریاست د استازي په ګډون، د پنځلسمې ناحیې د ګذر وکیلانو په مشورتي غونډه کې د دې ناحیې د (۲۸م ) ګذر وکیل شیرالله جبارخیل، د یادې ناحیې د ګذر وکیلانو د شورا د رئیس په توګه وټاکل شو. په دې مراسمو کې د پنځلسمې ناحیې رئیس عبدالبصیر خلیلي اخندزاده، د خپلو خبرو په ترڅ کې د چاپېریال او ښاري ستونزو د پېژندنې او د هغو د حل په اړه معلومات وړاندې کړل. نوموړي زیاته کړه چې، ښاریانو ته د ښاري چوپړتیاوو په وړاندې کولو کې د ګذر وکیلانو دنده او مسوولیت تر بل هر وخته زیات دی او اړتیا ده چې، د ټولنیز وضعیت د ښه والي او دښاري او سیمه ییزو ستونزو د له منځته وړلو په برخهکې د کابل ښاروالۍ له چارواکو سره هر اړخیزې مرستې وکړي. همدا راز نوموړي د دې ناحیې د ګذر وکیلانو د شورا د پخواني رئیس اسدالله کوهستاني د ګټورو خدمتونو او پرله پسې همکاریو څخه مننه او قدرداني هم وکړه. ښاغلي خلیلي زیاته کړه، د کابل ښاروالۍ مسوولان ښاریانو ته د لا ښو خدمتونود وړاندې کولو تابیا لري، د ګذر وکیلانو له نظریاتو او وړاندیزونو څخه په ګټې اخیستو به، خپل راتلونکي پروګرامونه او پلانونه تنظیم او د پلي کولو پړاو ته به یې ورسوي. د ګذر وکیلان سیمه ییزو ستونزو ته لومړیتوب ورکوي ترڅو یې د حل په پار د چارواکو لخوا اړین اقدامات ترسره شي.