د کابل ښاروالۍ له لوري د ملګرو ملتونو د خدمتونو ادارې (UNOPS) په مالي ملاتړ د دریمې ناحیې د دریم ګذر اړوند په تپه سلام سیمه کې د کوڅو او زینو جوړولو چارې پیل شوې. د دریمې ناحیې مرستیال مفتي اخترمحمد عثماني وویل چې، د یادې سیمې په دریو برخو کې د ۱۷۲ متره په اوږدوالي د یوه لښتي او زینو، د ۱۵۵ متره په اوږدوالي د کوڅو، لښتي او زینو جوړولو او د ۷۰ متره په اوږدوالي د کوڅو او لښتیو جوړولو چارې پیل شوې دي. د ښاغلي عثماني په وینا د یادو کوڅو، زینو او لښتیو په جوړېدو سره به خلکو ته د لنډمهاله بوختیاو رامنځته کېدلو سربېره د تګ راتګ او ترانسپورټ په برخه کې د خلکو شته ستونزې حل شي. د یادونې وړ ده چې، په غرنیو او صعب العبور سیمو کې د پروژو پلي کول د کابل ښاروالۍ لومړیتوب دی او په دې برخه کې به لا اغیزمنې کړنې ترسره شي