د پنځمې ناحیې د مسئولانو له لوري د یادې ناحیې په اړوند سیمو کې د ودونو په هوټلونو کې د حفظ الصحې له څرنګوالي څارنه وشوه. ددغو څارنو په پایله کې د یو شمېر هوټلونو مالکان، چې د کابل ښاروالۍ اصول او مقررات یې په پام کې نیولي وو، تشویق شول او نورو ته چې سرغړونې یې درلودې اړینې سپارښتنې وشوې. له سرغړونکو څخه ژمنه واخیستل شوه، څو هر څه ژر خپل فعالیتونه د کابل ښاروالۍ له اصولو سره برابر کړي، له دې پرته به له قانوني چلند سره مخ شي. په همدې توګه د څارنو په لړ کې په هوټلونو کې د شته خوراکي توکو نیټه او کیفیت هم وکتل شو او د هوټلونو دپخلنځي، او کارکوونکو له نظافت څخه هم څارنه وشوه.