ښاریانو ته د ښاري او سیمه ییزو آسانتیاوو برابرولو په نیت، د کابل ښاروالۍ له خوا او د ملګرو ملتونو د پروژوې خدمتونو د دفتر (UNOPS) په مرسته، د پنځلسمې ناحیې اړوند د پنځم ګذر دپنجصدفاملیو د نوآباد په غرنۍ سیمه کې د سړک جوړولو چارې پیل شوې. په هغو مراسمو کې چې په همدې موخه جوړ شوي وو، د پنځلسمې ناحیې رئیس عبدالبصیر خلیلي اخندزاده د خپلو خبرو په ترڅ کې وویل: دغه سړک (۸۰۰ ) متره اوږدوالی او (۵.۸ ) متره سور لري، چې د لښتیو، پلولارو او د زرغونې سیمې په ګډون به، د( ۱۰۰۰۰۰) سل زره امریکایي ډالرو په لګښت، د دریو میاشتو په موده کې په بنسټیزه توګه جوړ شي. نوموړي زیاته کړه چې، ښاریانو ته د ټولنیزو او سیمه ییزو آسانتیاوو د رامنځته کولو لپاره به، د دې ناحيې د نورو خاورینو سړکونو او کوڅو دجوړولو په اړه هم اقدام وشي او د سیمې له اوسیدونکو یې وغوښتل څو ددغه سړک په ساتنه او څارنه کې ورسره مرسته وکړي. ورته مهال د سیمې اوسیدونکو د دغه سړک له جوړېدو څخه هرکلی وکړ او ژمنه یې وکړه چې، د پروژو او پلانونو په پلي کیدو کې به له کابل ښاروالۍ سره هر اړخیزه مرسته وکړي. دیادولو وړ ده چې، د دغې پروژو له لارې د سیمې (۴۰۰) تنو اوسیدونکو ته دکار زمینه هم برابره شوې ده.