د کابل ښاروالۍ له لوري او د ملګرو ملتونو د پروژوي خدمتونو ادارې (UNOPS) په مالي ملاتړ، د شلمې ناحیې د دوه ویشتم ګذر په خیرآباد سیمه کې د دوه سړکونو د جوړولو چارې بشپړې او د کابل ښاروالۍ د ښاري خدمتونو او چاپیریال ساتنې مرستیال مولوي محمد خالد سجستاني له لوري په داسې حال کې چې، د کابل ښاروالۍ یو شمېر رئیسانو ، د سیمې اوسېدونکو او مشرانو یې ملتیا کوله ګټې اخیستنې ته وسپارل شول. ښاغلي سجستاني په دې اړه وویل چې، کابل ښاروالي په محرومو سیمو کې د پروژو پلي کولو ته لومړیتوب ورکوي، څو ښاریان اړینو آسانتیاو ته لاس رسی ومومي. د نوموړي په وینا په شلمه ناحیه کې به د سړک جوړولو نورې پروژې هم یو پر بل پسې پلې شي. ښاغلي سجستاني له ښاریانو غوښتنه وکړه چې، د سړکونو ساتنې ته پام وکړي، څو یې له ژر ویجاړېدو څخه مخنیوی وشي. د شلمې ناحیې په ۲۲م ګذر کې یاد سړکونه( ۴۰۰ ) او ( ۴۱۰) متره اوږدوالی او ( ۵) متره پراخوالی لري چې، د لښتیو په ګډون په بنسټزه توګه جوړ شوي دي. د دې سړکونو په جوړېدو سره به له یوې خوا د سیمې د اوسیدونکو موسمي ستونزې حل، او له بل لوري به ښاري او ټولنیزې آسانتیاوې هم رامنځته شي.