د ځمکې د سر اوبو د مدیریت په موخه، د کابل ښاروالۍ د تنظیف ریاست د کارکوونکو له لوري له لب جر څلورلارې څخه د ټایمنی د پنځم سړک تر څلورلارې پورې د وزیر آباد کانال د پاکولو چارې پیل شوې. له سرای شمالي څخه تر لب جر او شهید څلورلارې پورې د وزیر آباد کانال د فرعي کانالونو د پاکولو چارې څه موده وړاندې بشپړې شوې وې. ټاکل شوې ده، دا کانال د روان کال په بهیر کې له دریم پروان څخه د هوايي ډګر تر شمالي برخې پورې د لس کیلو مترو په اوږدوالي له کثافاتو او خاورو پاک شي. د دې کانال د بندېدو اصلي لامل د یو شمېر ښاریانو له لوري کانال ته د فاضلاب راګرځول او د کثافاتو اچول بلل کیږي.