د کابل ښاروالۍ د چاپیریالي روغتیا او چاپیریال ساتنې ریاست د مسئولانو له لوري، د پنځلسمې ناحیې په لوړو پوړیزو ودانیو کې د فاضلاب څاګانو له څرنګوالي، د مرکز ګرمۍ سیسټم لپاره د لوګي د تصفیې فلټر له شتون، د زرغونو سیمو له وضعیت او نورو چاپیریالي مسایلو څخه څارنه وشوه. د لوړ پوړیزو ودانیو مالکانو ته سپارښتنه وشوه چې، د هوا له ککړتیا څخه د مخنیوي او د حفظ الصحې د ساتنې په موخه دې د کابل ښاروالۍ اصول او سپارښتنې په پام کې ونیسي، له دې پرته به له قانوني چلند سره مخ شي. په همدې توګه د جذب نه لرونکې فاضلاب څاه شتون، د مرکز ګرمۍ سیسټم لپاره د لوګي د تصفیې فلټر شتون، د زرغونو سیمو لپاره ځای په پام کې نیول، د ودانۍ پاکوالي ته پاملرنه، هغه موارد وو چې، تر څارنې لاندې ونیول شول. د کابل ښاروالۍ د چاپیریالي روغتیا او چاپیریال ساتنې ریاست، د هوا له ککړتیا څخه د مخنیوي، په ځانګړې توګه د مرکزګرمۍ سیسټم لپاره د لوګي د تصفیې فلټر له شتون څخه د خپل عملیاتي پلان له مخې جدي څارنه کوي، څو د کابل ښار د هوا په ککړتیا کې کموالی راشي. د یادونې وړ ده چې، په تېر کال کې د دویمې، دریمې، څلورمې، پنځمې، لسمې، یوولسمې او اوولسمې ناحیو اړوند سیمو په( ۳ ) زره لوړپوړیزو ودانیو کې د لوګي د تصفیې فلټر له شتون څخه څارنه او پلټنه وشوه او دا پلان به په نورو ناحیو کې هم پلی شي.