د زرغونو او تفریحي سیمو د پراختیا په موخه، د شهر نو پارک د بیا رغونې چارې چې، څه موده وړاندې د کابل ښاروالۍ له لوري پیل شوې وې، لاهم روانې دي. د کابل ښاروالۍ د زرغونتیا رئیس مولوي عبدالوکیل متوکل وویل، د دغه پارک ځينې تاسيسات، چې پخوا ويجاړ شوي وو، بیاځلي رغول شوي دي. نوموړي زیاته کړه چې د یاد پارک د بیارغونې په چارو کې د زرغونې خونې جوړول، د خړوب منظم سیسټم رامنځته کول، د(۵۲۴۶) مترمربع مساحت سره د پلو لارو جوړول، د دایروي سړکونو بیارغونه، د زرګونو زینتي بوټو کېنول او د چمن کرل شامل دي چې، د پارک په انګړ کې د اوبو د یوې فوارې، یوه کلاسیک آبشار او د ښکلا د یوې بڼې د جوړولو چارې د بشپړېدو په حال کې دي. په همدې توګه د معیاري کټارو، د یوه ټیپیک کانتین او معیاري لوبغالي جوړولو، د اوږدو څوکیو د نصب او د تفریحي وسایلو د بیا جوړولو چارې هم تر لاس لاندې دي. شهرنو پارک، چې د څلورمې ناحیې اړوند د کابل په زړه کې یو له مهمو پارکونو شمېرل کیږي، (۹۲۳۴۸) متر مربع مساحت لري چې، د بیارغونې د پروګرامونو په پلي کېدو سره به ښاریان ډېر ژر په یاد پارک د مثبت بدلون شاهدان و اوسي