د ښاري تاسیساتو د ساتنې او ښاري ښکلا رامنځته کولو په موخه، د کابل ښاروالۍ د کلتوري چارو ریاست له لوري د احمدیار ګروپ کمپنۍ په مرسته د پنجصد فامیلیو څلورلارې د ښکلا او بیارغونې چارې بشپړې او د کابل ښاروالۍ د ښاري خدمتونو او چاپیریال ساتنې د مرستیال مولوي محمد خالد سجستاني او د کلتوري او ټولنیزو چارو د مرستیال مولوي حبیب الرحمن منصور له لوري د پټۍ په پرېکولو سره ګټې اخیستنې ته وسپارل شوه.په یادو مراسمو کې د کابل ښاروالۍ مشرتابه له هغو پانګوالو او سوداګرو چې تر دې دمه یې د ښاري ښکلا او آبادۍ په برخو کې برخه اخیستې ده مننه وکړه او ویې ویل چې، د ښاري ښکلا د پروګرامونو په پلي کېدو سره به یې د کابل ښار په بڼه کې مثبت بدلون راشي. د کابل ښاروالۍ د کلتوري چارو رئیس قاري ولي ګل جواد وویل چې، د پنجصد فامیلو څلورلارې د بیارغونې او ښکلا چارې د دوی د ریاست تر نظر لاندې ډیزاین شوې دي او د احمدیار ګروپ کمپنۍ له لوري پرې شاوخوا ۵ میلیونه افغانۍ لګښت راغلی دی. د یادې څلورلارې د ښکلا په چارو کې د څلولارې په تیږو فرش، د اوبو د فوارو جوړول، د زرغونې سیمې رامنځته کول، د زینتي بوټو او ګلانو کینول او د کټارو رنګول شامل دي. ورته مهال د کابل ښاروالۍ د زرغونتیا رئیس مولوي عبدالوکیل متوکل وویل چې، د کابل ښاروالۍ د مشرتابه له لارښونې سره سم لومړۍ له یادې څلولارې ناقانونه تاسیسات پاک شول، ځمکه یې هواره شوه او وروسته یې د زرغونولو په موخه اقدام وشو