د کابل ښاروالۍ د خلکو د همغږۍ چارو ریاست او د ګذر وکیلانو شوراګانو د رئیسانو تر منځ ، د سیمه ییزو ستونزو د پيژندلو او د حل څرنګوالي په موخه یې مشورتي ناسته ترسره شوه. په دې ناسته کې، د کابل ښاروالۍ د خلکو د همغږۍ چارو رئیس محمد ناصر کبیري، د ګذر وکیلانو له هر اړخیزو مرستو مننه وکړه او ویې ویل چې، اړتیا ده تر بل هر وخت ګذر وکیلان له کابل ښاروالۍ سره د پلانونو او پروګرامونو په پلي کېدو کې همکار و اوسي. نوموړي زیاته کړه چې، د ښار پر وړاندې ټول فردي او ټولنیز مسئولیتونه لري او د ګذر وکیلانو شوراګانې کولای شي په ښه توګه سیمه ییزې ستونزې په ګوته او د حل په موخه یې له مسئولانو سره شریکې کړي. ښاغلي کبیري وویل چې، له مسئولانو سره د ګذر وکیلانو مرسته باید لا پراخه وي، څو د ښاري ژوند قانوني کېدو ته زمینه برابره شي. په یاده غونډه کې د ګذر وکیلانو شورا رئیسانو خپلې ستونزې له مسئولانو سره شریکې کړې او د غونډې په لړ کې لازمې پرېکړې هم وشوې