د کابل ښاروالۍ د کلتوري چارو ریاست له لوري د ګلبهار ګروپ شرکت په مرسته د ښاري ښکلا د یوه سمبول د جوړولو چارې بشپړې او ګټې اخیستنې ته وسپارل شو. د کابل ښاروالۍ د کلتوري چارو رئیس قاري ولي ګل جواد وویل چې، د ارزول شویو پلانونو له مخې کابل ښاروالي په دې هڅه کې ده څو، د کابل ښار په بڼه کې مثبت بدلون راولي. د نوموړي په وینا د ښاري ښکلا پروګرامونه د تاریخي، ملي او کلتوري ارزښتونو د ساتلو په موخه د ښار په نوموتو سیمو کې پلي کیږي. د کلتوري چارو رئیس له هغو ملي سوداګرو او پانګوالو چې تر دې دمه یې له کابل ښاروالۍ سره د ښاري ښکلا پروګرامونو په پلي کولو کې برخه اخیستې ده، مننه وکړه. په دې درې لارې کې له داخلي تولیداتو څخه په ګټه اخیستلو د ۶ متره په لوړوالي او د درې متره په پلنوالي د شاوخوا یو میلیون افغانیو په ارزښت د ښاري ښکلا یو سمبول جوړ شوی دی. د ګلبهار ګروپ شرکت مرستیال غلام رباني رباني وویل چې، ګلبهار ګروپ د کابل ښاروالۍ له پروګرامونو او پلانونو ملاتړ کوي او په راتلونکې کې به هم له کابل ښاروالۍ د ښار د آبادۍ او ښکلا په برخه کې مرسته وکړي