د اوومې ناحيې په (۲۹م) ګذر کې د یوه فرعي سړک د جوړېدو چارې، چې څه موده مخکې پیل شوې وې بشپړې او د اوومې ناحيې د رئيس مولوي عبدالغفور غفور لخوا ،په داسې حال کې چې د سيمې یو شمیر مشرانو او اوسېدونکو هم حضور درلود،ګټې اخیستنې ته وسپارل شو. د اوومې ناحيې رييس د ملګرو ملتونو د پروژوي خدمتونو له دفتر (UNOPS) څخه، چې د دغه سړک په جوړولو کې يې له کابل ښاروالۍ سره مرسته کړې، مننه وکړه او ویې ويل، چې د يادې ناحيې په بېلابېلو سیموکې به ښاري او چاپېريالي ستونزې هوارې شي. نوموړي د سيمې له اوسېدونکو غوښتنه وکړه، چې د دغه سړک ساتنې ته جدي پاملرنه وکړي، څو له وخته مخکې يې د ویجاړیدو مخه ونيول شي. دغه فرعي سړک چې ( ۹۷۸ ) متره اوږدوالی،په منځني کچه (۴) متره سور لري، او د حسن خان پله سیمه د پډولې له عمومي سړک سره نښلوي، د شپږو میاشتو په موده کې د( ۱۲۰ ) زره امریکايي ډالرو په لګښت په بنسټیزه بڼه جوړ شوی دی