کابل ښاروال مولوي عبدالرشید د مالیې وزارت د املاکو له عمومي رئیس محمد سعید انصاري سره د کابل ښاروالۍ د ملکیتونو د پېژندنې او له هغو څخه د سمې ګټې اخیستنې په اړه خبرې وکړې. په دې لیدنه کې کابل ښاروال وویل، چې د کابل ښاروالۍ د ملکیتونو د ثبت او راجستر لړۍ په الکترونیکي بڼه پیل شوې ده، چې له یوې خوا له دې منظم الکټرونیکي سیستم څخه په ګټه اخیستلو، د ملکیتونو د پیژندنې او ثبت، د ملکیتونو د شمیر او ډول او د کرایې او اجارې له برخو څخه د کابل ښاروالۍ د عوایدو په راټولولوکې شفافیت او روڼوالی رامنځته شوی، او له بلې خوا د چارو په ترسره کولوکې د چټکوالي او د ښې حکومتوالۍ په برخو کې هم ګټورثابت شوی دی. په پای کې اړونده اړخونو پريکړه وکړه ،چې د کابل ښاروالۍ او مالیې وزارت تخنیکي کمېسیون دې د شته حل لارو او سیستمونو په کارولو سره ،د کابل ښاروالۍ او مالیې وزارت د ګډو ملکیتونو د کره پېژندنې او سمې ګټې اخیستنې لپاره په ګډه کار وکړي.