د کابل ښاروالۍ د ښاري خدمتونو او چاپېریال ساتنې دمرستیال مولوي محمد خالد سجستاني په مشرۍ د ښار او چاپېریال د پاک ساتلو او د نېکمرغه لوی اختر په ورځو کې په بیلا بیلو زونونو کې د څارویو د پلور ځایونو د ټاکلو په اړه غونډه ترسره شوه. په دې غونډه کې چې د کابل ښاروالۍ د بېلابېلو ناحیو رئیسانو په کې ګډون درلود؛ پریکړه وشوه چې، په عامه ځایونو او نورو ښاري او عامه سیمو په ځانګړې توګه د لوی اختر په ورځو کې د څارویو پلورل منع دي. په همدې توګه د کابل ښار په بېلابېلو زونونو کې د څارویو د پلور لپاره ځانګړي ځایونه وټاکل شول چې، له نورو ښاري سیمو څخه به څاروي دې ځایونو ته ولیږدول شي او د پتې موندنې په اړه به یې ډېر ژر د کابل ښاروالۍ له خپرنیزو کانالونو معلومات خپاره شي. دا کار له بیلابیلو ناروغیو د ښاریانو د خوندیتوب او د ښاري تاسیساتو د ساتنې په برخه کې ګټور او مهم دی، او له بلې خوا هغه ښاریانو ته چې، غواړي د اختر په ورځو کې څاروي وپيري، آسانتیاوې رامنځته کېږي