د کابل ښاروالۍ د کار ، ساتنې او مراقبت ریاست له لوري ښاریانو ته د تګ راتګ په برخه کې د آسانتیاو رامنځته کولو په موخه، د لومړۍ ناحیې اړوند د یک پیسه ګي پله د بیارغونې چارې روانې دي. د یاد ریاست د سړکونو او پلونو د بیارغونې آمر انجنیر شریف الله قادري وویل چې، د پله د کانکريټ کولو لومړی پړاو بشپړ شوی او له دې وروسته به یې د دیوالونو او لاندنیو برخو د بیارغونې او د کټارو رنګولو په اړه اقدام وشي. نوموړي زیاته کړه ، دغه پل (۴۵) متره اوږدوالی او (۲.۷۵) متره سور لري چې، د پله د ټینګښت ستنې هم د بیارغونې په چارو کې شاملې دي. یک پیسه ګي پل د کابل سیند پر سر یو له پخوانیو پلونو څخه دی چې، درې پیړۍ مخکې جوړ شوی دی. له یاد پله څخه د مردخانې، علي مردان بڼ او ورڅيرمه سیمو اوسېدونکي ګټه پورته کوي