د اوه لسمې ناحیې اړوند له باغ بالا څخه تر بادام باغ پورې د نوي نښلوونکي سړک دجوړیدو په موخه، ددغه سړک په اوږدوکې تر استملاک لاندې کورونو او شته خنډونو د ویجاړولو او پاکولو چارې پيل شوې. د کابل ښاروالۍ د استملاک رييس انجنير عبدالمتين حنيف په دې اړه وويل، چې د سيمې اوسیدونکو د دې پروژې له پلي کېدو څخه هرکلى کړى دى اوددغه سړک په اوږدو کې( ۹۰ ) ملکیتونه او کورونه تر استملاک لاندې دي ، چې داستملاک قانون له مخې به یې مالکانو ته حقوق ورکړل شي. نوموړي زياته کړه، د دغه مهم سړک په جوړېدو سره به د کابل شمال له لوېديځ سره ونښلول شي، چې له يوې خوا به د ښاريانو په تګ راتګ کې آسانتياوې رامنځته او له بلې خوا به د ګاونډيو سيمو اقتصادي ودې ته زمينه برابره شي. په پام کې ده چې د خنډونو د پاکولو او تر استملاک لاندې کورونو د ویجاړولو د چارو تر بشپړیدو وروسته، دغه سړک د (۹۰۰) مترو په اوږدوالي او (۲۰) متره سور سره په معیاري او بنسټیزه بڼه جوړ شي