د اتمې ناحیې د رئیس مولوي عبدالحي حکیمي، د دوه ویشت ګونو ناحیو د ګذر وکیلانو دشورا رئیس عبدالمجیب صافي او د خلکو د همغږۍ چارو د استازي په شتون کې، حاجي حکیم جان ابراهیم خیل د اتمې ناحیې د ګذر وکیلانو شورا د رئیس، حاجي عمران امیري د مرستیال او ډاکتر محمد رفیع میرزاده د منشي په توګه وټاکل شول. د اتمې ناحیې رئیس د یادې ناحیې په کچه د ستونزو پیژندلو او د حل په اړه رڼا واچوله او د غوره ښاري خدمتونو په وړاندې کولو کې یې د ګذر وکیلانو رول مهم وباله. نوموړي زیاته کړه چې ګذر وکیلان باید تر بل هغه وخت له مسئولانو سره همغږي او همکار و اوسې، د سیمه ییزو او ښاري ستونزو په پیژندلو او د حل په موخه یې باید له هیڅ راز هلوځلو ډډه و نه کړي. ورته مهال د اتمې ناحیې د ګذر وکیلانو شورا مسئولانو ژمنه وکړه چې، د مسئولیت منلو حس پر بنسټ به د آبادۍ او ښاري پراختیا په برخو کې خپل مسئولیت په ښه توګه ادا کوي. د کابل ښاروالۍ د خلکو د همغږۍ چارو ریاست د معلوماتو له مخې، په اتمه ناحیه کې( ۵۰ ) ستندرد ګذرونه شته دي چې، ټول یې وکیلان هم لري