د خلکو په رواني لید او ښاري ښکلا کې د غوره بدلون رامنځته کولوپه موخه، د کابل ښاروالۍ د کلتوري چارو ریاست له لوري او د ملت سټیل اوسپنې ویلې کولو فابریکې په مرسته، سرای شمالي چوک ته په غځیدلي ګلدان کې د ښاري ښکلا پروګرام د پلي کولو چارې دوام لري. د کابل ښاروالۍ د کلتوري چارو رئیس قاري ولي ګل جواد وویل چې، په دې پروګرام کې د ښاري ښکلا د یوه سمبول، ګلدانونو او چمن جوړول، د اوږدو څوکیو نصب، د اوبو د فوارو جوړول او له تيږو څخه د (۷۰۰ ) متروپه اوږدوالي د پلو لارو د جوړولو چارې شاملې دي، چې تر یوې میاشتې پورې به په بنسټیزه توګه چارې بشپړې شي. ښاغلي جواد د ښار په نورو نوموتو سیمو کې هم د ښاري ښکلا د پروګرامونو له پلي کولو خبر ورکړ او ویې ویل چې، د ښاري ښکلا پروګرام ته پراختیا ورکول کیږي. نوموړي له هغه سوداګرو او متشبیثینو چې، تر دې دمه یې د ښاري ښکلا دپروګرام په پلي کولو کې برخه اخیستې؛ مننه وکړه او هیله یې څرګنده کړه چې، نور ملي پانګوال او سوداګر دې هم د ښار په ښکلا او آبادۍ کې خپل ملي او ښاري مسئولیت ادا کړي