په پغمان کې د څوارلسمې ناحیې اړوند د دریم ګذر یحیی خېلو په سیمه کې د سړک او ویالې جوړولو پروژه بشپړه او د کابل ښاروالۍ دپروګرامونو او پروژو د تنظیم رئیس انجنیر میرالرحمن ناصري له خوا ، په داسې حال کې چې، دیادې ناحیې مسوولانو او د سیمې یوشمېر اوسیدونکو هم حضور درلود، د پټۍ په پرې کولو سره ګټې اخیستنې ته وسپارل شوه. په هغه مراسمو کې چې له همدې امله جوړ شوي وو، د کابل ښاروالۍ د پروګرامونو او پروژو د تنظیم رييس د ښاري آسانتياوو د رامنځته کولو په موخه، دکابل ښاروالۍ د طرحو او پراختيايي پلانونو د بيانولو په ترڅ کې وويل: په دې سیمه کې د (۴۲۴ ) مترو په اوږدوالي او د( ۴.۵ ) مترو په سور سره د یوه فرعي سړک جوړول،او همدارنګه د کرنیزو ځمکو د خړوبولو او د سطحي اوبو د مدیریت په موخه ، په ټولیزه توګه د ( ۵۵۸ )مترو په اوږدوالي، ( ۵۰ ) سانتي مترو سور او (۶۰ ) سانتي متره ژوروالي سره د دوو لښتیو جوړول، چې د کابل ښاروالۍ له لوري او د ملګرو ملتونو د پروژوي خدمتونو د څانګې په مرسته، د( ۱۱ ) میلیونه افغانیو په لګښت په بنسټیزه توګه جوړې شوې دي. همدا راز نوموړي د سيمې له اوسېدونکو هيله وکړه، چې د ياد سړک ساتنې ته جدي پاملرنه وکړي، څو له وخته مخکې يې د ویجاړیدو مخه ونيول شي. په ورته وخت کې د پغمان د یحیی خېلو سیمې اوسېدونکو د کابل ښاروالۍ له پروګرامونو او پلانونو څخه خوښي څرګنده کړه.، د یادولو وړ ده چې، د دې پروژې په پلي کیدو سره له یوې خوا (۱۵۰ ) تنوته د کار زمینه برابره شوې وه، او له بلې خوا دوی ته چاپېریالي او سیمه ییزې آسانتیاوې رامنځته شوې دي.