د کابل ښار له شمالي برخې د ذاکرين له ښارګوټي څخه د قمبر تر څلورلارې پورې د ( ٧٦٤٥ ) مترو په اوږدوالي او ( ٣٠ ) مترو په سور سره دسړک جوړولو چارې، چې څه موده مخکې د کابل ښاروالۍ د کار، ساتنې او څارنې رياست له خوا پيل شوې وې، اوس هم روانې دي. دسړک جوړولو په دې پروژه کې د سړک د غاړو لښتي، پلې لارې، ګلدانونه، د سړک په اوږدو کې استنادي دېوالونه، د ترافیکي دهلیزونو جوړول،د څراغونو نصبول او دکرښو اچول شامل دي، چې د څه باندې ( ۵۳۰ ) میلیونه افغانیو په لګښت به د (۱۶ ) میاشتو په موده کې بشپړ شي. دغه سړک چې د کابل شمالي او لوېدیځې برخې یو له بل سره نښلوي، د اوه لسمې او پنځمې ناحیو تر منځ جوړېږي، چې دکابل ښار د پراختیا، اقتصادي ودې او همدا راز د ترافیکي بهیر د وېش په برخوکې د ډېر اهمیت وړ دی. د یادولو وړ ده چې، د د دغې پروژې د پلي کیدو په موخه، د یاد سړک په اوږدوکې د شته خنډونو لرې کول او د استملاک شویو کورونو او نورو ملکیتونو د ویجاړولو چارې په چټکۍ سره روانې دي