د کابل ښاروالۍ، اطلاعات او کلتور وزارت، د ښار جوړونې او ځمکو وزارت، چاپیریال ساتنې ملي ادارې او د آغاخان فرهنګي بنسټ ترمنځ په لومړۍ او دویمه ناحیوکې د تاریخي سیمو د جوړولو او بیارغولو په اړه د همغږۍ ګډه غونډه ترسره شوه. په دې غونډه کې تر خبرو اترو وروسته پرېکړه وشوه چې، د اړوندو ادارو داستازو په ګډون دې یو ګډ کمیسیون جوړ او په پوره همغږۍ سره دې د تاریخي سیمو د بیارغولو په اړه یوه جامع کړنلاره جوړه کړي. د کابل ښاروالۍ د پلان جوړونې او ښاري پراختیا مرستیال ډاکتر صدرالدین تاجک ډاډ ورکړ چې، د کابل ښار په پراختیايي پلانونو او پروګرامونو کې به د تاریخي ارزښتونو او فرهنګي میراثونو ساتنې ته لومړیتوب ورکړل شي. نوموړي ټینګار وکړ چې، په تاریخي سیمو کې د ودانیو د جوړولو په کړنلاره کې؛ باید د کابل ښار د معمارۍ هویت او زاړه جوړښتونه شامل شي. کابل ښاروالۍ د پخوانۍ معمارۍ د څرنګوالي او هویت له مخې، د کابل ښار په تاریخي او پخوانیو ځایونو کې د ودانیزو چارو د زمینې برابرولو په برخه کې هر ډول همکارۍ ته چمتو ده